منتديات شباب البصرة
مرحبا بك عزيزي الزائر. المرجوا منك أن تعرّف بنفسك و تدخل المنتدى معنا. إن لم يكن لديك حساب بعد, نتشرف بدعوتك لإنشائه

منتديات شباب البصرة

BASRAGUYS
 
الرئيسيةالبوابةس .و .جبحـثالتسجيلالمجموعاتدخول

شاطر | 
 

 أبوذيــات ... أنور بري الماجدي

اذهب الى الأسفل 
كاتب الموضوعرسالة
أنور بري الماجدي
بصراوي
بصراوي
avatar

عدد الرسائل : 11
العمر : 32
البلد : العراق _البصره-الزبيـر
الهوايه : المطلعه والشعر وحب الأستكشاف
العمل : كيمياوي
التقيم : 10
نقاط : 25
تاريخ التسجيل : 07/05/2010

بطاقة الشخصية
وسام التميز وسام التميز: 0

مُساهمةموضوع: أبوذيــات ... أنور بري الماجدي   07/05/10, 09:40 am


((أجـمــل الأبـوذيــه))
مقتطفـات من شعـراء العـراق
أنتـاج:
>>أنـور بـري الـمـاجـدي<<
♥♥♥♥♥♥♥♥♥♥♥♥♥♥♥♥♥
(شهرها)
الوگت حاربني وسيوفه شهرها
روحي الكلشي ‎ماسوت ‎شهرها
الوادم صلت وصامت شهرها
وأنا صيام العمر فرضوا عليه

(بلا جار)
علي جار الوكت تنشد بلا جار
بعت بيتي وسكنت البر بلا جار
بلا صاحب بلا زاير بلا جار
وخيال الكوخ صاير جار اليه

(بلوشفتك)
وحق شامت خدودك بل وشفتك
بجمالك منته رحمه بلوه شفتك
والك طرگاعه خدك بلوه شفتك
ومصيبه بضحكتك طاحت عليه

(ساره)
حبيبي الكلب ماسرني وساره
بطريق العدل دل حبي وساره
احب اثنين بس أمي وساره
وادعي من الجليل تصيراليه

(ساره)
مشت‎وگليبي وي ممشاهاساره
ويگلبي المافضح فد يوم سره
شفت شمس وگمربخدود ساره
عجيب أشلون أكظنهة بديه

(نوره)
وحگ قـرأنـه وكهفــه ونوره
الگمرمن تبتسمله يغيب نوره
والج ماغلـط من سماج نوره
اذاخدودج شمس وتشع عليه

(الاء)
وحـگ الي مله الكـونين الاء
مثل عين الغـزال عيون الاء
امد ايدي عليهــا تكول اه لا
كلشـي ولا تمد ايـدك عليه

(روان)
انواع الدهـرمن ضيمه روانه
ودجله الما بعد مايـك روانه
صوتج ما شفـت مثله روانه
وعيونج سحر عمت عليه

(مروه)
وحق حجاج بيت الله ومروه
أشرب من نهر زمزم ومروه
الگمربالسمه يشعشع ومروه
گمر بس يشع من الناصريه

(عبير)
عبرج كلبي وينـه كلبج عبيره
وعطرج عن بعد ينشم عبيره
اظل للموت احب اسمج عبيره
وبيابي العين لشفافج هديه

(نعمه)
محبتنـا عليـكـم هـاي نعمة
بعدكم مااظن انشـوف نعمة
اكوغنية بشريط حسين نعمة
كافي من البعد حنو عليه

(وصاك)
من حسنك يذوب الثلج وصاك
ولا تنكر وصيته الكلب وصاك
ادور عالصديق النشط ولصاك
اشو عاوين هم شحو عليه

(لوحه)
يالترسم علي كل يوم لوحه
بعدك ما تميز الجيم لو حه
إذا حامض بالأول عود لوحه
العنب بالكاع وتلم أمن أديه

(ولك مال)
الگمر دنك يبوسك والك مال
والگلب زاعلها كلها ولك مال
أمتحنه لاطلع راسب ولااكمال
طلع شاطر وأخذ بالوفه ميه

(وارقها)
الك اجمل تحيه ابعث وارقها
حبرهادموعي وعيوني ورقها
يلمسبب سهر روحي ورقها
عزيز وشوفتك تصعب عليه

(وصلهه)
روحي اوياك ماتكطع وصلهه
تفـرح لـو خبـر منك وصلهه
المحبه وياك معناها واصلهه
وتظل رغم البعدغالي عليه

(عسى الجن)
حبيبي‎شوصف‎شفافك عسل جن
اذا انسـاك يركبني عسى الجن
انامسودن‎وبيك‎ادعي‎عسى الجن
سطرراسي وهذن ‎رعشات‏‎اديه

(عسى البيك)
أامرني والبيلك عسى البيك
عساهن بيه يفترن عسى البيك
حنظل لوضكت خدك عسل بيك
وشفتك للنحل وجبه شهيه

(ياصف أنته)
الوصف يفلان عاجز ياصف انته
شحلاته يا ضحكته ياصفنته
انهجم بيت المدارس ياصف انته
المدير بكبره ياخذلك تحيه

(صح تحل)
امتحنتك ردت اجربنك صح تحل
تشد جرحي واذاشفته صح تحل
بعدني ماطحت يمك صحت حل
لو طايح صدك شتسوي بيه

(گال لايوز)
گلت خوخ البصدرك گال لايوز
گلت مفرد يناهي گال لايوز
گلت مرخوض أشمهن‎گال‎لايوز
تجد لذه ويصيبك طمع بيه

(وراويك)
أنه القاص سالفتك وراويك
وعلي ظميت ليمونك وراويك
يدور الوكت يا خلي واراويك
وأذكرك من ترد وتبوس أديه

(مال اوف)
حسنك مال حسره واه مال‎اوف
لأن كلك ترافه وغير مالوف
اذا الاگيك وجه بوجه مالوف
أشبگك حتى لو تنفجر بيه

(ترى الهام)
موتعليم شعر الحب ترى الهام
وبعد مادنگ الغيرك ترى الهام
شوفك مو مهم عندي ترى‎الهام
حبك والنبض يسرن سويه

(مايتاني)
بروحي العمر يركض مايتاني
وأنه العطشان منك ماي أتاني
تعال اليوم باچر ميت أني
عگب باچر چذب تلحگ عليه

(حياني)
ميت والعشك ردني وحياني
دنك باسني بخدي وحياني
سئلني وگتله بصراوي وحياني
أشك الگاع لو عالو عليه

(ماتحسبيه)
ليش انته اليحبـك مـاتحسبيه
وكل جسمي بغيابك ماتحسبيه
أگل الروحي كافي ماتحسبيه
تگلـي ويـاه أريدن للمنيه

(ياسياسه)
ذبل عمري بغيابك ياسه ياسه
وأريد اليـاس منك ياسه ياسه
وتگلي‎أحجي بسياسه ياسياسه
سايستك گبل تضحك عليه

(تراكم)
المصايب صارت اعليه تراكم
اوسلبت الروح بلفركه تراكم
يريت العين هليله تراكم
وسولف ما جرى ومامر عليه

(لاحوگـ)
يالخدك شبه شمام لاحوگـ
وجنت گبلي عالزينات لاحوگـ
اذا تمشي ووراك12 لاحوگـ
حبيبي شلون ماتنغر عليه

(والسناد)
اريدك دوم الي هيبه‎والسناد
الغيرك لاتظن احجي والسناد
التحالف ماترجعني والسناد
اذا حنيت لحبابي بهالمسيه

(ملازم)
صفه حبك تره بكلبي ملازم
و ابيع الروح لعيونك ملازم
صرت شرطي وعلية انته ملازم
وكمت بس تلتفت اخذ تحيه

(ملازم)
انا الخطيت من حجيك ملازم
واذا تزعل من البوسه ملازم
جنت جندي وعليك انه ملازم
سقط صدام وافترت عليه

(من تجاره)
الدمع جرح خدودي من تجاره
وتجاره الحب تگلي من تجاره
عليه شبيج ارحمي منتي جاره
وأنا جارج والله موصي بيه

(واتجاره)
عليك العين تهمل واتجارة
يراس المال انتة والتجارة
هنيالة الصار جارك وأنتةجارة
ويشوفك كل صباح وكل مسية

(من خيالي)
اصيله الروح تنشد من خيالي
وافز مرات اخافن من خيالي
شكثرحاولت احذفك من خيالي
خيالي انحذف وانت الهسه بيه

(والمعين)
وحق الرازق الفقره والمعين
ياهو بضيج مد أيده والمعين
هاك عيوني طشرهن والمعين
وأبيع العين لوطحت برديه

(وادله)
اجه كلبي يدليني وادله
وعندي اثار من حبه وادله
اهلناذوله اهل سفره وادله
وشمسكم زهت كبل الجاهليه

(طحنه)
هاك الكلب بيدك حيـل طحنة
أمس علوالنخل واليوم طحنة
ابشركم بالهوه ياناس طحنة
تحب كلوبنة وتهوه الاذية

(وهدنه)
العشك منه أستراحينه وهدنه
واخذنه من الدمع راحه وهدنه
يحلو الطول فك ياخه وهدنه
عجزنا من الهوى وناره سويه

(يرمد)
جفن الي سهر بالليل يرمد
وبحر الحزن مابيه جزر يرمد
شمالك ماتطيب الجرح يرماد
هفت جمرك ولا دفيت أديه

(وجه لك)
الله من الگمر خالق وجه لك
شلون أنســاك يمعود وجهلك
افكـر بيـــك بگماطك وجهلك
وأحبك وأنته تلعب ليه ليه

(ورقه منك)
قلم گلبــي تـداين ورقه منك
لان ماكو بجمالك وارقه منك
أحطـك أنتــه الاول وارقمنك
واكتب لافته محجوز اليه

(ورق ماي)
ماي الجنه بعيونك ورق ماي
ورساله تريد اوديلج ورقماي
كلها الكاع لو تصبح ورق ماي
تكفي أكتب الك نص الي بيه

(ورايه)
أأما بيها والجامع ورايه
وصفيت‎امشي وره الجانوورايه
نويت أهجم شلت سيفي ورايه
رماني بسهم عينه وطاح بيه

(ونخلك)
حلفت ما أكعد بفيك ونخلك
شلون تكول‎انته‎اخويه‎وأناأخ لك
لجيبن منخل الخوه وانخلك
واطلع كل أخو يكول شعليه

>>أنـور بـري الـمـاجـدي<<
((07703111269))

(وعدنا)
نسينا الشوق وحلفنا وعدنا
وعلى الهجران ردينا وعدنا
هذا من الوكت والحب وعدنا
وهذامن القلب وافعاله الرديه

(وفربيه)
يفر بيه الوكت نوبه وفربيه
ومن ثلج العمر دربي وفر بيه
أشرد وين أنا بقلبي وفر بيه
واعوف الناس والعالوا عليه

(وانتخلي)
نخيت أجفوف أديه وما انتخلي
وسألت الزمن بعدي من تخلي
يصاحب ليش تغدر منت خلي
كضيت وياك عمري وخنت بيه

(وصخونه)
يهل رايح لخونه وص خونه
وترى العذال بعدك وصخونه
وزاد المرض بيه والصخونه
اريدك بس تجي وتسأل عليه

(منصاح)
صاح بصوت هز العرش منصاح
مثل عباس بالخوان منصاح
اكل الدهر تنصح كال منصح
أخذ مني عضيدي وفتك بيه

(وعيده)
يهل ناديت بسمي أرجوك عيده
ويهل ماخذ دليلي وياك عيده
الكلب مو بعد رمضان عيده
أنه عندي العيد من نكعد سويه

(علي حال)
هموم هواك ماخلن علي حال
فريضه وحبك من الله علي حال
ويهل ‎تنشدعن‎احوالي علي‎حال
شيفيد النشد عالصار بيه

(وأناشراح)
صار سنين ماتفهم وانا شراح
ليش جروحي يلتحمن‎واناشراح
راح تروح من عندي واناشراح
راح اصفك اظل بثنين أديه

(يومي لحد)
جذب جفي بعدكم يومي لحد
وهواكم وين حده يو ما لحد
أنا لو ما أجيكم يوم الحد
الثنين من الصبح نغمه عليه

(وي نمر بيك)
جمع ربك غزاله وي نمر بيك
وأدور وين شهدك وينه مربيك
ومر بيه تكلي وين أمر بيك
أمر شلون بيك وأنته بيه

(قص أيده)
يوسف شافك بحلمه قص أيده
وابو الطيب خجل يمك قصيده
رمشك شاعر وعينك قصيده
وعمت عينه اليكلك مو قويه

(وجوري)
ورد قداح أهديلك وجوري
وريدن ضيمي أحجيلك وجوري
موجر والعشك كمل وجوري
وشبه بركان حبك صار بيه

(لوله بيه)
العشك كاروكه يامه لوله بيه
وفرني شلون فره لوله بيه
أحبها وحبها سوه لوله بيه
ارجف لويمر طاري الحب عليه

(موطبيعي)
أحبج حب جنوني موطبيعي
وبطلي ببيع ثكلج موطه بيعي
طبع الشهم طبعي مو طبيعي
أغدر وأنثني بسابع ثنيه

(بستك)
زوج طيور حبنه صفن بس تك
وصرنا للشماته علج بستك
مدري شجاني وكمت بستك
أعذرني عالجرالي ومو بديه

(وسبني)
كلمن كال سوف أعمل وسبني
جنه بحجيه شتمني وسبني
أكله من الوطن اطلع وسبني
أنه أبني الوطن بثنين أديه

(وخله)
زمانك لو زعل وياك خله
وأسكت لا تبين بيك خله
موسهله الخليل يعوف خله
بس صعبه الكرامه تموت بيه

(من أزفهن)
أنا جروحي عرايس من ازفهن
وغدت حمرت حلكهن من نزفهن
أنا من أزمخ عليهن من أزفهن
أنط زهكان ويضحكن عليه

(ودكه)
حلوه الشامه البخدك ودكه
وتدك وياي دكه بأثر دكه
بعد ماأوصل الدارك ودكه
لأن ساسك رمل ونهدم بيه

(لصبه)
دمعي صبابه الك وحدك لصبه
ومحاجيك عسل عالمخ لصبه
الكلب جم سيطره بروحي نصبه
غيرك مايمر لو مو هويه

(والمحنه)
فاض الشوك بيه والمحنه
وكون أحظه بخيالك والمحنه
الم شمعات بيه والم حنه
حزنا لأن ما مريت بيه

(وأنته راوي)
أراوي جروح كلبي وأنته راوي
روايت شوك روحي وانته‎راوي
عثك الناس حشم وأنته راوي
بريمك طاح من خدك بديه

(ونصفي)
ربع عمري الج‎يرخص ونصفي
يحلوه أرجوج أفهميني ونصفي
نصفي غارك بحبج ونص فيه
سبع لوعات بس يبجن عليه

(واعلمنك)
دريتك بيه تغدر واعلمنك
وصيتي ايفوق صيتك واعلمنك
يصير الخير باجر واعلمنك
واصفالك وارد الحك اليه

(منتظركم)
وحق حجة الاهك منتظركم
روحي بنار احطها منتظركم
صار أشكد اتاني منتظركم
سبع ساعات مافكرتوا بيه

(حلها)
علي مرت مصيبه ودار حلها
وبيدك يا علي الكرار حلها
أحبها والشرع والدين حلها
وحيه عندي يحرمها عليه

(ولعصار)
زلازل ماتهز كلبي ولعصار
وطحن ما أثر بحالي ولعصار
لجن حاله‎اصبحت عندي ولعصار‎
تذوب الروح من تجبل عليه

(شعبان)
شعب واحد ابد منصير شعبان
ونور الهدايه انكشف شع بان
قسم بلي أنولدبالنصف شعبان
نظل للموت خدام الزجيه

(وتراب)
عيوني تعاين عالدرب وتراب
وروحي مايهمها الخطر وتراب
الشامت يرى كبرك حجر وتراب
ويرى التاريخ كبرك مزهريه

(وهم بيك)
يهالواضح ولا بين وهم بيك
بيك الليل بس اصفن وهم بيك
وبيك الحسن ميزه وهم بيك
حنين وأحن من روحي عليه

(بعد وين)
يكلبي لاتبطل الون بعد وين
ومثل ماضيعت تلكه بعد وين
حبيبي ألجان يهواني بعد وين
تركني وما بعد ينشد عليه

(سكراني)
قفل حبك بكلبي سكراني
وماي ألسان حلكك سكراني
أبشرك صار بيه سكرأني
وحلاة شفاك هل عمت عليه

(عرضه)
كل احنه ترة للموت عرضه
ونتوسد كبرنه ذراع عرضه
هنياله الحمه من الناس عرضه
يضل مستور عايش للمنيه

(مرحل)
تعال وياي ليش اليوم مرحل
الك عكدات وسط احشاي مرحل
جبتها وياك يوم بيوم مرحل
تصير استاذ من تالي عليه

(ماصاح)
تكدر خاطري ونحاس ماصاح
على الردت الولم وياه ماصاح
طبع بيه وره المجفين ماصيح
ابه وعزه نفس وعناد بيه

(وشراها)
كضه وكت المعاتب وشراها
طفل وسيوف هجره وشراها
عرضت للبيع روحي وشراها
اخوي وباعها الشمات اليه

(نصن)
الك منـي رسـاله شوك نصا
يالمنـك جبــال الشــام نصن
مو حكه دليلي نقسم نصين
نص الكم والاخر بس أذيه

(عده انته)
تعال احسب بهمي عده انته
وكلبي شعده غيرك عده انته
ازعل الناس كلهه عده انته
لأن زعلك يزعلني عليه

(ضال مني)
كضيت سنين عمرك ضال مني
وانا عكلي بصدودك ضال مني
تكلي شضال منك ضال مني
بس مجرى النفس تلكاه بيه

(شمعنه)
بس بينه الدهر يفتر شمعنه
غفلنه و فوك غفلتنه شمعنه
مومثل الشمع صدك شمعنه
نهار وليل ضواهن سويه

(واصليك)
احبـك من تصل ليـه واصليك
واكطع كلبي بفراكك واصليك
احسك ركعه كل ساعه واصليك
واصيح الله اكبر حن عليه

(بالحال)
تعكد حبلي وعليه تشح بالحال
يحالي الماصفيت وياي بالحال
تدري لو غبت شيصير بالحال
احس لاحول الي ولاحال اليه

(بالحال)
اتنخه تريد اجيك اليوم بالحال
وانت اعرف حبيب الروح‎بالحال
شمحله وياك ما تقتنع بالحال
ادليك الدرب وترد عليه

(حالن)
حبيبي جروح الك بالروح حالن
وامس چنت احسن ماليوم حالن
اريدك تنتخيلي وتمر حالن
باچـر وين ما تلحگ عليه

(تسلسل)
تره بأول سطر حبك تسلسل
وفركتك تسعربكلبي تسل سل
اذا تنشد عن أحوالي تسل سل
بسبب فركاك متوسد المنيه

(ونتخينه)
ثگيل الحمل خويه ونتخينه
وزامطنه بلبنه ونتخينه
شعجب تنكر خويتك وانته خونه
الف وسفه اعله اخي الباع اخيه

(ونداي)
انا الدوه العلاتك وانا الداي
وجريمه اصبحت خصمي ونداي
المثلك حصو ما نگط ونداي
الحصوبنص المحيط ويشح ميه

(وهج روح)
اعدبسنين عشرتنه وهي جروح
واحسويالنفس يطلع وهج روح
واخيراگتلي ودعني وهج روح
اروحن وين ما اكدر هوه انته

(ولاشي)
عكب عينك صرت صدك ولاشي
ولملم كمت بجروحي ولاشي
اضحك جذب وياهم ولاشي
واكول احباب من غصبن عليه

(عالطار)
طار وماكلت للناس عالطار
وشسولف‎عالجرج بالكلب‏‎عالطر
جنت وياك شايل خلك عطار
طفل ماتشتري وتلعب عليه

(ونساك)
وحق من غنت الأطلال ونساك
ماتحلى الليالي بغير ونساك
وصوتك‎مومثل‎كل‎صوت ونساك
ولايمر النسيان فد يوم بيه

>>أنـور بـري الـمـاجـدي<<
((07703111269))

(رابطه الها)
يكلبي الي تحبها رابط الها
وحرز بالروح صدك رابطه الها
انا الشاعر واسوي رابطه الها
واخلي اهل الشعر تحتار بيه

(تولم)
خزن جرح دلالي تولم
عالماصح الي وياهم توالم
الجان تريد ويانه تولم
خاف تكول مامرو عليه

(ولاهواني)
احسك ذاك منته ولاهواني
ولا ذاك الهويته ولا هواني
التهيت بغيري انته ولاهواني
بغيرك ما افكر للمنيه

(وعيدك)
الليالي شهود اذاناسي وعيدك
بلكي تعود للماضي وعيدك
شعلت شموع ميلادك وعيدك
وفرحت وياك رغم الجرح بيه

(مالك)
جنت يمي واحس الدنيا مالك
ملت للغير لوله الوكت مالك
عليه شغيرك يا زين مالك
بس أحجيلي طف النار بيه

(منته قسمه)
قدر مكتوب حبك منته قسمه
الواحد ماله ناتج من تقسمه
لون بسيوف كلبي من تقسمه
تشوف محبتك شمسويه بيه

(وراماي)
هاجت عالكلب كلش وراماي
والوذن كمت يا صاحب وراماي
انه ادري اليمش ينذب وراه ماي
سبع حصوات ليش اذب عليه

(وعتباي)
كونك توصل البابي وعتباي
تجيني وتسمع بلومي وعتباي
بنص الليل فز كلبي وعت بي
والك جاباني يسحل كوه بيه

(ولكمانه)
بجفه الكلب طكنه ولكمانه
ودخيل الكم اصيح ولكم انه
الكلب عدكم يشاعر ولك امانه
واليخون الأمانه يخون اخيه

(ويروح)
يفز كلبي بتوالي الليل ويروح
يمك يالمليته هموم ويروح
عشرتي وياك‎مثل‎جسد ويروح
اذاتتركني أموت شلون بيه

(يمتى حني)
يم حنت حنانج يمتى حني
يمتى اليوم باجر يمتى حني
جيبي اكبر مدرس يمتحني
اوعدج بالعشك اخذ الميه

(ودور)
دنيانه ترد وتروح ودور
وانصحك لاتلف وياي ودور
يالبعدك تجد عالدار ودور
انه بخطوه وصلت الثانويه

(وانشد)
خلص عمري ادور عليك وانشد
وبحروفك اغني صرت وانشد
بعدك بس نداوي جروح ونشد
نخيط جرح بس تنفتح ميه

(فضله)
المثلي شلون ينسه مثل فضله
عطش كلبي وحبيبي نهار فضله
الكرم‎من‎راس‎جدره موش فضله
ولاينطي وتحسف بالعطيه

(ولك اواريك)
الوكت زامطته كتله ولك اواريك
واله بثره الخيبه ولك اواريك
عشرتي‎وياك‎مرضع والكواريك
ادفعك غاد وادري ترد اليه

(ولاصاك)
مرتب ماشفت مثلك ولاصاك
وياهو الخربطك بعدي ولاصاك
كبل ماكاتل بأيدي ولا صاك
من حبك أصك بثنين أديه

(وادهه)
شماتي ابله من الشمر وادهه
وبعيونك تذوب الروح ودهه ولو چلمات للولهان ودهه وضمد جروح گلبي السبع ميه

(ما طال)
عساه بعدك گصيرالعمرماطال
يمن وجهك بعد عالعين ماطال
رده حضي ولشخصك ابدماطال
لون محضوض كلك بين اديه

(ساري)
مفعول العـشگ بالكلب ساري
وحبك احس بالشريان ساري
عليك اتمرضت واصبحت ساري
لاشير ولاهلي نشدوا عليه

(ومهدلك)
گليبي اختارك لجتلي ومهدلك
هدعليه شلون ياخلي ومهدلك
الك بيت بوسط كلبي ومهدلك
تمرجح حيل وتدلل عليه

(وداوي)
الكلب شاجرعلى ابن امه وداوي
تضعضع ونهدم ركنه وداوي
لا مجروح حتى اكعد وداوي
ولا غايب وكول يعود ليه

(وراها)
همي من كثر يذبل وراها
ونار الكلب ما يخمد وراها
كل شده يهل وادم وراها
فرج والفرج من رب البريه

(ترابيك)
تهزهز ياكبر وانفض ترابيك
وعزيز الروح هالنايم ترابيك
اجاني العيد وعيوني ترابيك
انهض لاتشمت اعداي بيه

(لاعم)
لا خال اليمر بالضيج لاعم ومخصن بالحجي ياصاح لاعم كتلني العوزصار اشهور لاعام ولا واحد سئل منهم عليه

(عمي أنا)
قسيت اوياك يسمر عمي أنا
أوعين الماتشوفك عمي أنا
إذا خالك فزع لك عمي أنا
تبرى أوضحك الوادم عليه

(علي شار)
تهت محد من احباب علي شار
ينجيني الذي شمسه علي شار
حجيت المصلحه طلعت علىشار
رجيت الغانمه صارت رديه

(لهاني)
اعذرني والوكت عنك لهاني
بعداك الزاد الي ابدا لهاني
تفر من البدن روحي لهاني
بسبب ماشالت التابوت هيه

(كراهه)
الدمع نهران بخدودي كراهه
حبيبي سلب من عيني كراهه
ليش امحبتك صارت كراهه
اشبده مني وتشمت اعداي بيه

(يهلهه)
من مثلي دمع عيني يهلهه
سبب غالب على روحي يهلهه
وعلي تحيولكم ميت يهلهه
من تبدي ترد الروح اليه

(رد رد)
اصيح بصوت ونته وياي رد رد
احبك لا تروح بعيد رد رد
اذا جتك رسالة شوك رد رد
لان ردك يرد الروح اليه

(سواك)
احبك مااحب على الارض سواك
سبحانه الذي من طين سواك
بشر لكن وي الكمر سواك
واحد فوك واحد بين اديه

(والمساك)
انه‎اليوزن صديجه بذهب‎والماس
ومااهب‎الموت حدالسيف‎والماس
لاجن‎صديجي‎منيمسني بعيب‎وال
اكدرنه ابجلب ينبح عليه

(وجيبي)
يدنيا زيدي ابنارج وجيبي
وبعد اهموم حمليني وجيبي
انه وسفه لو خلت ايدي وجيبي
انه الشامت والاخو يضحك عليه

(هواكم)
هوينه احنه وهوانه من هواكم
وهوى الغربي احسه من‎هواكم
مرار وضيم ضگنه من هواكم
اگص ايدي اذا تسأل عليه

(ماراد)
لعب بيه زماني شلون ماراد
نفس روحي‎ياصاحب راح ماراد
اگله تريدني يگول ماريد
عصر گلبي وشعل نيران بيه

(هوا انته)
اروحن وين ما اكدر هوا انته
وانا الما هان من اجلك هونته
الي بدنياي شي واحد هو انته
وافتخربيك من صبح حد المسيه

>»أنـور بـري الـمـاجـدي«<
((07703111269))

(وهلها)
اهلال افراكم روحي وهلها
ودمعتي مره أكفكفها وهلها
البصره وكل نواحيها وهلها
الوجودك فرحت وادت تحيه

(ورده منه)
دوم احتاج ثغرك وردى منه
واخذ ورده الحدايق وردى منه
اطم بير الموادع واردى منه
اذا مره اجيت بشوك اليه

(خاطر انه)
أبدمع عيني أكتبتلك خاطر أنه أولك مايوم كاسر خاطر أنه غير أنته ألتجيني خاطر أنه
أجيك أزحوف من غصبن عليه

(ساعديني)
عذاب الشوك شبك ساعديني
ساعه انخه الايمه ساعه ديني
على نص المصايب ساعديني
كلف ظيم العشك كله عليه

(والأمساك)
وحك‎رمضان واصيامه والامساك
ابدا ماملن صباحك والامساك
يسويه البخت مره والامساك
احس الجنه صارت بين اديه

(حطين)
وحك صفين والخندق وحطين
املش الراس بغيابك وحطين
واطيرمن الفرح صدك وحطين
اذا بالطيف مره اتمر عليه

(يامحامي)
حمه جسمي بغيابك يامحامي
والك گضيت عمري ياماحامي
بعد ما يلحگ عليه يامحامي
اذا روحي وعلي ترفع قضيه

(ماشعلني)
گصير الدرب مالك ماشعلني
وانه ضنتي بجهنم ماشعلني
انطفيت وغير حبك ماشعلني
قيامه الوحدي سويت بيه

(يلماس)
رقيق بشكل كلش ترف يلماس
الهوا ويه الخدود بخجل يلماس
صباح العافيه بكل صبح يلماس
المسه والصبح بشفافك سويه

(وافضلاك)
اعلى‎كل‎الناس اميزنك وافضلاك
ودمعي‎ماجره الغيرك وفضلاك
انه امنذكر بعض طيبك وفضلاك
اشكرك كل صباح وكل مسيه

(حنه الكم)
كل لحظه ودلالي حنه الكم
بجيت وخضر جفوفي حنه الكم
وحياتك ماحنه لغيرك حنه الكم
راسي وبينت خله عليه

(حوله)
جرحك مابره ولادار حوله
بدليلي ومن مديت الشرك حوله
الوكت ينظر عليه بعين حوله
سلب روحي وطلع مشتبه بيه

(ونسجنه)
تحوك بثوب حسنك ونسجنه
بجهنم حبك ارضى ونسجنه
انحبسنه بقفص عينك ونسجنه
وتحط رمشك كلبجات بأديه

(غزلهه)
هجم حبك على اسنيني غزلهه
وروحي بمغزل الحسره‎غزلهه
رسايل بس الك يحله غزلهه
يبو طبع العسل عينك عليه

(رخصتك)
رخه جسمي‎بمحبتك‎من رخصتك
واسومن بيك‎غالي من رخصتك
دست فوكي دكلي من رخصتك
حتى براحتك تسحك عليه

(والك صب)الك‎بس‎هل‎دمع‎عيني والك صب
ولك‎ساس‎بوسط روحي والك صب
سهم هجرك دخل صدري ولك صاب
دليلي وصار طشاره بديه

(يريدك)
حلو واضح جمالك من يريدك
وحسنك‎يعمي‎كلمن من‎يرى‎ايدك دروح وشوف غيري من يريدك
اله شغله تعرفهه وهاي هيه

(انته ونته)
يون بسمك دليلي انته ونته
تاه وأرد اسألك انته ونته
يحب اثنين غيرك انته ونته
تركني وانته بس ضليت بيه

(نبله)
اخوي اللي اعتنيته نبلا
رماني وشج الي بحشاي نبله اذا احنه امن اهلنه النوب نبله اشتظن‎نرجه‎الغريب اعلى‎الحميه

(وشلتك)
العگل تكين تك انجن وشل‎تك بسبب‎‏ داريتك بزغرك ‎وشلتك عصرتك عصربچفوفي وشلتك لگيتك بس عذاب ونوح اليه

(ولاني)
زماني من زغر سني ولاني
أخوي وأعز خلاني ولاني
لامطبوخ يطعمني ولاني
أطحن بالصبر والهم بديه

(مرصيدك)
صفت عودان ايدي مرصيدك
مره تصيد روحي مرصيدك
اذا سنتات ضلن مرصيدك
اخذ من عمري بس رمش عليه

(ماهمني)
ماهمني بدليلي الدهر من دج
ولامره شكيت الحال من دج
طرت هاماطرت بالريش من دج
شبر ومخالف الجيلات بيه

(ماجن)
عفيه وظل عكل بلراس ماجن
وحتى اطيوفهم بالنوم ماجن
خجول‎اهواي‎بس‎بالشوك ماجن
الوج اعليك جن مكروص حيه

(صفيت)
بجيت وبالدمع للعين صفيت
اخبطوايامااخبطووشكثر صفيت
يصاحب ويه دهري علي صفيت
انطبكتوا اثنينكم عدوان اليه

(زعلك)
انه الزايعني وكتي وانته زعلك
ومنومن كلبي جرك وانته زعلك
ازعل الدنيه كلها وانته زعلك
يظوجني بحيث ازعل عليه

>>أنـور بـري الـمـاجـدي<<
((07703111269))

(يلمني)
علي ضاكت الوسعه من يلمني
وجرحي بيش اهيده من يلمني
ترى اللايم يصاحب من يلمني
يزيد جروح فوك جروح بيه

(يمنه)
الدهر بس البراسه جنون يمنه
غدر بينه وبجاري الجان يمنه
لان ماتنتصر يسره بغير يمنه
ولايمنه بوحده اتحل قضيه

(حايه)
شوكت يخلف زعلنه ونه حايه
ونسيت الليل ساهر ونه حايه
شغله ازغيره عندك ونه حايه
اتعرفه انته لجل تبخل عليه

(وناسي)
جيتك يل احس انك وناسي
ولجلك عفت كل ربعي وناسي
لكيتك شو تحب غيري وناسي
لكلب يهواك ما حطلك اذيه

(وفضه)
عقد ياقوت ذرعانك وفضه
عالمخلوق طش حسنك وفضه
حسابي وياك أريداكعد وفضه
وأحجي اللي علي والموعليه

(شفتك)
شخلص يافرح وشوكت شفتك
وتطوگت بغرامك حين شفتك
مريض انه ودواي بطرف شفتك
تصل لشفاي رشفه من المنيه

(عالشفاي)
مرضت‎انه‎وصعدمرضي علشفاي
وطب لندن فلا يلحك علشفاي
حبيبي من تحط شفتك علشفاي
أطيب وكل مرض مايبقى بيه

(وصفه)
أحبك حب ما ينكتب وصفه
عليك الكلب مثل الذهب وصفه
عليمن يكتب الدكتور وصفه
عيونك والشفايف صيدليه

(ولاراك)
روى الزيتون‎من‎دمعي ‎ولاراك
لغيرك مانحل جسمي ولاراك
أخاف أطول غيبتكم ولاراك
وكبل وصلك تبادرني المنيه

(وريدك)
صرت دم المشه بداخل وريدك
ومثل متريد مشيني وريدك
فراكك حيل مرمرني وريدك
على اجروحي تدوس بلا خطيه

(وريدك)
انه دمك التارس وريدك
احبك كلي تعرفني واريدك
سائل واطلبتك منك وريدك
شتنطيني انعملله وهاي هيه

(تراكم)
جفت وعيوني ماظنهه تراكم
أسى وعتاب لبصدري تراكم
الحزن من شالوا احبابي تراكم
بسبب جتالة فركتهم عليه

(يالمني)
ضلوعي والحدرهن يالمني
وأظن عكلي يصاحب يالمني
على عيني سطرني يلمني
غريب اشلون مايشتمت بيه

(يراهن)
جروحي بروحي‎خفيه‎من يراهن
اعيوني وعمت الكم من يراهن
بعد يومين اموتن من يراهن
اذا مامتت عوده أعتب علية

(حسيت)
شمالك بيه مافد يوم حسيت
أحس جرحك بماي‎العين حسيت
تدري بيوم عني ارحلت حسيت
العمر وي روحتك راح من اديه

(سنتين)
سن سيفه عليه الدهر سنتين حسافه اندوخ بالأرهاب سنتين أخبرك من رصيدي بكه سنتين أذا عندك رصيد ألتفت ليه

(مرن)
مفارك والليالي سنين مرن
وعلي صاير لذيذ الزاد مرن
طفر كلبي على النقال من رن
لان حسيت روحي أدك عليه

(ولاحد)
شفتك كمت ما اشوفن ولاحد
وخريطه عليك متكظني ولاحد
بموتك انه ما ابجي ولاحد
اريد وياك تاخذني المنيه

(عده انته)
تعال احسب بهمي عده انته
وكلبي شعده غيرك عده انته
ازعل الناس كلهه عده انته
لأن زعلك يزعلني عليه

(تراكم)
جثير الهم على كلبي تراكم
وكصيتو وياي ياحبابي تراكم
تود العين كل لحظه تراكم
ولو بالطيف مرتكم عليه

(مره غني)
الليالي بنص وحلهن مره غني
مره ابجي اعله حالي مره‎اغني
رغلت موت وكتي مره غني
تعهد مايظل ينگاد بيه

(كله فتنه)
جمال وجان عندك كله فتنه
واجب رغم حجيك كله فتنه
تدري شكد فرگتك كلفتنه
مثل الراح دفان بأخيه

(صليت)
غفيت وجنه حلمي بنار صليت
وكلمن فسراها بلدغ صليت
ابشرك عكب ذاك الطيش.صليت
ولهسه ابليس دايخ بالقضية

(وجناك)
حلو دمك يلالي بين وجناك الف رحمه على الرباك وجناك
لون بيدي جنت أشريك وجنيك
حرز بالبيت تدفع كل أذيه

>>أنـور بـري الـمـاجـدي<<
((07703111269))

(نخله)
بذرالشوك بارض الشوك نخله
ولاساعه القلب منالحسرات يخله
صرت مثل اله بنص الشام.نخله
تمر للغير وانا النوح اليه

(طلعت)
موعشره تراها وياك طلعت
كل ساع احس الروح طلعت
اناشفت الشمس باليل طلعت
اكل للناس مايصدكون بيه

(منطر)
هلة بريح الشمال الجاي منطر
عزيزه انت وعليج القلب منطر
شفت خدج عبالي الفجر منطر
كمت صليت من غصبن عليه

(حالي)
علي ثوب الونين شكثر حالي
شاب وهل شبت من دون حالي
انشدج على احوالج مثل حالي
طايح والهموم اتشيل بيه

(علي حال)
هموم اهواك ماخلن علي حال
فريض حبك من الله علي حال
يالتنشد على حوالي علي حال
شيفيد الندم على الصار بيه

(ورجيته)
الج بس انتي كلبي ورجيته
ودمع العين يمج بس ورجيته
ابتعد كلمن نخيته والي رجيته
ولاواحد اجه وحن عليه

(مارعاني)
رعيتك ليش كلبك مارعاني
ويهمك فت دليلي ومااعاني
مره‎احبس‎دمع‎عيني ومره‎اعاني
ومره اتطيح روحي بين ايديه

(بلا حد)
هجرك يا ولف صاير بلا حد
مثل سيف اليكص ركبه بلاحد
رحت وانتظر ترجع انت بلاحد
اجه الاحد يمته اتعود اليه

(ولاطاب)
غيرج ماحلى بعيني ولاطاب
ولادونج دخل كلبي ولاطاب
وجرحي وياج لاهود ولاطاب
دم ينزف ولاتدرين بيه

(بايات)
شلون تخون وأنت حلفت بايات
مزلاكة طلعت مو درج بايات
تريد تروح مو بس باي بايات
واليرجع ألف نعلة اعلى أبيه

(واردهه)
تروح الروح بغيابك وأردهه
وكتاب جفاك يمدلل وردهه
روحي بغيابك ترةيذبل وردهه
ماي أنته وترد الروح بية

(بيران)
أريد أحفر بوسط الكلب بيران
عطشان وانه بوسط بيران
وحق الرضة المدفون بأيران
ما عوفك مدام النفس بية

(ياحيف)
جرى دمعي‎على الوجنات‎ياحيف
وعلى‎الناس‎الماتقدرتعب ياحيف
أني الجنت أخوف خفت ياحيف
ولذت بالجانوا يلوذون بيه

(ويهلك)
عشكتك من صغر سنك ويهلك ايحبك ليش يتعذب ويهلك
اغار عليك من تمشي ويهلك
لجن وية الغريب شلون بية

(تسيل)
دمعتي اشمرد انشفه تسيل وعليه ايام هجرانك تسيل
اذا انته عله حالي تسيل الشماته والوكت طبكن عليه

(مرحب)
الك مني سلام والف مرحب
مرت صداقه شكثر مر حب
وحق من طبر بالسيف مرحب
تظل انته الصديق الغالي ليه

(طحنه)
هاك الكلب بيدك حيل طحنة
أمس فوك ألنخل واليوم طحنة
أشبدينة وبالهوه ياناس طحنة
غشمة كلوبنة وتهوه الاذية

(ماجن)
نار فراكم بالكلب ماجن وعليكم زين عندي عقل ماجن رسايلكم عجب لليوم ماجن السبب شنهو كطعتوهن عليه

(سائل اني)
عليك المات ولحي سائل آني
صلب لكن الربعي سائل آني
وكفت بباب بيتك سائل آني
اذا ماتنطي ليش اتكص اديه

(مالاح)
نطرته‎ايلوح شخصك علي مالاح
وكصر حبل المودة اوياك مالاح
شحط فوك الملح ويصير مالاح
ويغزر بالاوكله ابذن اديه

(حلاك)
من شدك بكلبي وعيب حلاك
جمالك لغز يبقا وصعب حلاك
تعرف ليش ربك حيل حلاك
حتى ابتلي بيك وهاي هية

(وصادق)
أنا أسمي أبوجاسم وصادق البكلبي على لساني وصادق احب التقي واتعرف وأصادق وأتمنه ألف صديق يصيراليه

(يابوه)
اذا طاري الاحبه بيوم يابوه
يا يمه امنهل الدمع يابوه
عجوز بمكبره لوصيح يابوه
اخلي المكبره تبجي عليه

(منشار)
يروحي‎الشارماظن خسر منشار
أشجايب يا دهر وياك منشار
صرت‎خشبه‎ورموني‎بحلك منشار
وجنت فولاذ فنه اليمر بيه

(مرتنا)
والله ايام حلوه مرتنا
ومرة انتل هواكم مرة اتنا
دام انفصل رتلك من رتنا
بعد هيهات جمعتنا سويه

(شجاني)
طبعك مو شجي وكتلك‎شجاني
شجنيت وياك شو كلي شجاني
امس‎جنت انحظن وانشم‎شجاني
كنفذ والحظن حسرة عليه

(وشرح)
مرد كلبي بهدوئه مرد وشراح
الاكله العمر راح يكول وشراح
صديقي‎وساعة‎اسولف‎اله‎واشرح
ومن خلصت كال انا شعليه

(شفتك)
ردت افتك لجن ياصاح شفتك
منك يل عبالك تين شفتك
محد كلي بس ابهذن شفتك
تحط فوكي حطب والنار بيه

(طابكاني)
الدهرتطبيك كاشي طابك اني
واظن انه بهواكم طابك اني
اذا دبدوب عندك طابوكه اني
طابوكه ولا رصيد ولا هويه

(وي عظام)
بغيابك‎حزني‎ظل‎يكبر ويعظم
اضحك جذب بس اني‎وي عظام
خلافك‎صرت‎بس‎جلده وي عظام
اظل بلا جلد بس عظم بيه

(ولما)
صرت منخل لجل ربعي ولما
وطبعهم ماي ما يلم ولما
شلتهم طاحو كبالي ولما
طحت ركظو خذو ثوب العليه

(منك)
ابتعدنا السبب مني اوف منك
واظن هيهات اشوفن اوف منك
تسليني وكلك اوف منك
هسه الاوف منك سلوه اليه

(وكفاك)
اظن وني ترس سمعك وكفاك
من اكلك مدلي ذرعانك وكفاك
كتلك ليه فك كفك وكف فاك
تفك فاك وتكف كفك عليه

(ظل ماي)
ابشرك بعد مابالعين ظل ماي
وحس‎حتى‎الصبح‎بجفاك‎ظل ماي
زماني مرادف‎عله‎الروح‎ظل ماي
وسلب عقلي‎وشدهني وشد اديه

(حل)مشكلتي‎ويه‎الوكت‎ماالهاصدك حل
بالكوه اشدآحبل‎كالولي وكتك حل
واكف‎اباب‎الفرح‎وبجفوفي‎ادكن حيل
وظليت ادكن عمر محد عليه ظهر
سالكني بيده‎الوكت‎ليل وصباح وظهر
اتكول‎بين‎الخلك‎بس انا عندي ظهر
بس بجربتي صبر الناس منها ملت
سعفاعله‎رمله‎اوكفت‎والوكفه‎مني‎ملت
من هاجت العاصفة اعترف انا ملت
بس‎من‎اجا شامتي‎واكف‎عدل ظليت
وعن دربه كد الشبرصدكني ما ظليت
بجفوف اديه هذن عل عاصفة ظليت
لن ما اريدن علي تنكال كلمت شرد
الدرب كله حفر وتكلي ردله شرد
صاحبي‎العشرةعمرمن‎عنده‎اني شرد
غيرالهله‎ومرحبابس‎كون‎من كل كلب
موبس‎اطيحن‎غفل‎من‎وحده‎هو كلب
هذا كتاب العمر وبكيفك انتا كلب
تقرا اللي ماينقري علشفه من الربع
وحصتي‎من‎الفرح‎ماصحلي منها ربع
تشوفه‎خريف‎العمربس‎انااكولن ربيع
وكابرت‎لن‎الشجر ناكت‎اوراكه نكت
لحدماصفيت بحلك هذا وهذاك نكت
فوكاها لمن طحت والوكت بيه نكت
صاحبي‎بترس‎الاذن‎سمعني‎كلمت حل

(موسما)عشرتنابيهالوفه‎فطره‎وابد موسما
ولوماتغيب‎الشمس‎كلت‎السما موسما
اسأل‎جميع‎الهوى‎عن‎قصتي‎‏ موسما
قصةغرامي‎مثل‎ماانا لك
سميت
قلبي‎بنفس‎طيبتابالحقدما
سميت
بسم‎الله‎بذره‎عشك‎طشيت‎انا وسميت
وعذالنا لأاسف حصدو كبل
مو سما

(بل سما)
حيرني جرح القلب محد عرف بل سما
وصوبني‎سهم‎الزمن‎موبس‎رمي بل سما
ميت ورد احجيه واقسم قسم بل سما
بسم الحبيب النبي اعدل اذا رديت
يا من ملكت الكلب عظمي‎نحل رديت
مرسال الك بالدمع خطيتا ما رديت
اتأخر جوابك علي بيتك شني
بل سما

(صده)
من‎التقيناشعجب‎عن كلبي كلبك صده
ومن‎اجاسهمك‎يهف‎بس‎قلبي كام وصده
تعلم‎ويروحي‎كمت‎من‎حجي‎اسمع صده
موصده‎ثاري‎طلع‎صوتي‎وصوتك شرك
تبقاانتاكلشي‎الي‎ولاتكلي‎كفني شرك
رغم‎اللي‎ضدنامشووبنصنا نصبو شرك
عشرتناتبقاذهب‎وعمرالذهب ما صده

(علي)جابتني‎امي‎بيسرحين‎اللي‎صاحت‎علي
والناس لمة فرح ملتمه كلها علي
يدعون‎هذاالصبي‎يحفظه‎سميعآ علي
ورظعت‎حب‎الوصي‎من‎ثدي حب فاطمه
وشبيت ويه العشك ولاني فاطمه
حيث ادري بمحبتي النار الظا فاطمه
ويهوا حب حيدرا وحب فاطمه والحسن
مااميز بهذا الوكت بين الردي والحسن
ليغرك بدنيتك براق لون وحسن
امشي‎عدل‎‏ لاتمل بسم الحسن وحسين
وعين اللي‎دونك‎بشربحاجة الك وحسن
ولليبغظك جابله بصبر وحلم واحسان
حيث المقوده‎الصبردوم‎الرفيجه يعلي

>>أنـور بـري الـمـاجــدي<< ((07703111269))
(مطرقه)يلقوي‎بلعب‎الطرق‎عمي العشك مطرقة
والهوا صد وهجر ياصاحبي مطرقة
بالشعر اطرق نظم‎كبلي‎احد ما اطرقة
ومن‎روحي‎ادفع‎كمت‎حرف‎الشعرظربته
بس القصيده خسر كل اليظم ظربته
ادري يأذي الدهر اوف شعظم ظربته
سندان صير وصلب كون الدهر مطرقة

(صاحبي)
بتين اللي بالكلب ما ظلي بت صاحبي
يل‎تسل‎عن صحتي ما ظن بعد صاحبي
بالليل تغفه الخلك والليل اظل صاحبي
عكبه القلب ما يطك لو ماتكف دكته
بسمارروحي‎اصبحت كل الخلك دكته
صاحبي ارد اشكره ممنون من دكته
وياي حيل وبعد جيفن كلت صاحبي

(مرض)يروض‎كل‎الحسن‎روض‎انت‎اظنك‎مرض
لاكن‎رغم رقتك كل عظمي‎منك مرض
وياك‎انااشكدوفي‎وشخصك‎عليه مرض
موش انتا الكلت‎‏ مايحصا حبك بعد
هسه‎اشعجب‎ياترف‎شخصك‎عليه بعد
راح‎اعتنيلك‎واجي‎ومشايه اجيبآ بعد
وان‎ترضه‎كانابهاماترضه طبك مرض

(ولي ناح)
حمام الدوح مر بيه ولي ناح
وتمنيت اعتني الدارك ولي ناح
سفينةامن‎الحزن‎روحي‎ولي ناح
بكد عمره نهد والبيه بيه

(لومه)
كلبك ردت قصدي بس الومه
وحبنه اللي تطشر بس المه
صدك جا تركتك بس لو ما
اخاف اترك وانا ابتلي بيه

(راحت الها)
المصايب ياما روحي راحت‎الها
بعز فرحتي وسلبت راحت الها
خلص قررت حالآ راح اتلها
من عله الجبل لحلوك المنيه

(ندالي)
ندالك كلبي وكلبك ندالي
تعال الفرح خل بيه ندليه
اذا انا الورد انتا ندالي
احظنك كل صباح تمر عليه

(سده)
اخذني الروج وانا الجنت سده
ودين اللي اطلبه ولا سده
لأن من النخيته الباب سده
وبصفه عدل ما ذب اليه

(ولاهن)
انا جدامي الالم غفلة ولاهن
وعليهن دهري بسهامه ولاهان
لاهن بالمشي ركن ولاهن
يمشن عدل ويسترن عليه

(هداه)
ملك كلبي الحزن مايوم هداه
ولا فيظ الدمع بجفاك هداه
دخذ كلبي وعليه وياك هدا
ينكرني اذا كل دغش بيه

(بيداي)
مهموم الكلب بيه جرح بيه داي
وتيهن لو مشيت بأدر بيداي
انا منوصل البابك ودك بيداي
احس الباب هوا يدك عليه

(يرحن)
تجيني هموم من هموم يرحن
وانا سنيني البوحات يرحن
عكب عينك شلت بالكلب يرحين
غيابك والشماته التمر بيه

(يارت)
الدنيه حاربتني وحيل يارت
والي بحبل النوايب غفل يرت
جبت كل العمر ياريت ياريت
ولا بشارة فرح مرت عليه

(ونحلاي)
الك‎اشكي عسر حالي ونحلاي
وبجا حتى‎الصخرلجلي ونحلاي
عليه بمشكلة جعفر ونحلاي
لذت بيدك يحماي الحميه

(وعيناك)
اعرفك ما اتيه ابدآ وعيناك
ولو المثلي علدنيه وعيناك
معدن من ذهب طبعي وعينك
عمت كد مايشع النور بيه

(مره مني)
دخلي الكلب يفرح مره مني
طحت بسهام هجرك من رمني
اكول السبب منك مره مني
حرت من حيث اعدن من اديه

(وشبه)
يلايم گوم طف روحي وشبه
على العجه أم سگم وشبه
أحبه وگلت يشبهني وشبه
يفل منشاف ومض الشيب بيه

(تشويه)
يصاحب لو يصيبك يوم تشويه
حجايا الناس لدلال تشويه
اليگولوله عما من يطيح تشويه
صاحو من طحت لاگي لگيه

(ونتخبناه)
الوطن هدمه وبنائا ونتخبناه
الوطن گام ونخبنا ونتخبناه
الوطن ذمة انتخبنا ونتخبناه
الوطن ذمة بركاب اهل الحميه

(خافن)
ثكيله همومي بيه وعيب خافن
ودرت بيهه انحنيلك مايوم خافن
بعت ثوبي وكلت ماجيك خافن
تكول‎افلان اجه وطخ راس اليه

(مخافه)
اخف جدمي بس جدمه مخافه
صديجي وماكتم سري مخافه
اذا من الله ماعندك مخافه
سوي اشما تريد اتسوي بيه

(لمه)
العمر ماي وتبده صعب لمه
وعلي نكبات دهري غدت لمه
نشدته اشوكت تفرح كال لمه
اشوف اجنازتك تمرك عليه

(وشلني)
البجي‎فد نوب من دمعي‎وشلني
عماني وسلب عافيتي وشلني
النخيته وكتله كومني وشلني
انتخاني وشالني وذبني ابهبيه

(لهاشاب)
الاسود من صدع بابي لهاشاب
ودوى جانون لي بكلبي‎لهاشاب
اخبرك دار المضيعة لهاشاب
التهت بالضيم والونه الشجيه

(منالباي)
أشماله الدهر مايقنع منالباي
ولاني ومابكت وذرة منالباي
وطبيبي صار متحير منالباي
ولا يكدر يكلي شنهي بيه

(شرهن)
جروحك للشمس ياصاح شرهن
وليالي الضيم ماينحمل شرهن
الك عمري رهنته بعد شرهن
اذا حتى العمر ماظل اليه

(ولافج)
يدنيا شغيرج كولي ولافج
وسد بابه الفرح عني ولافج
عساني ماصرت بارضج ولافيج
شكثر اعزاز شتتي منديه

(شبنا منا)
علينه الوكت جاسي شبنامنا
شعل بجلاي ناره شبنامنا
انهدم مبناي فوكي شبنامنا
عمود الدار هطايح عليه

(وجلاي)
دليلي من القهر ممرود وجلاي
مشا ولا ريض الجناز وجلاي
يسكيني بشراب الماي وجلاي
عزيز وشوفته بعدت عليه

(وشيل)
نشف دمعي لمن وشيل
عليك وما نفعنا الخيط وشيل
اذا ناوي تعوف الدار وشيل
معاك انشيل يلذاتك وفيه

(وندار)
مثل دارك عيب تحصل واندار
مثل دار السكنها منين واندار
اقبل داير الجدران واندار
اون بلكت تحن الدار اليه

(ماتبينا)
بعدنه بحبنا الكم ماتبينا
وجم واحد لجلكم ماتبينا
يربي المهدي وينا ماتبينا
خبطت ياهو اليصفي الدنيه

(فطراني)
طحتلي بربع عكبك فطرآني
نهر يابس وهجرك فطرآني
صوتك وانا صايم فطرآني
منشوفن صورتك شيصير بيه

(مره عدهم)
مرة أفقد أحبابي ومرة عدهم
وتمطر طيب روحي من رعدهم
ومرة ألكلب عندي ومرة عدهم
روحين بجسد جنة سوية

(وردني)
مشيت الشوق رجعني وردني
ومسحت الدمع بچفوفي وردني
أذا مرسال من عندك وردني
أحس الدنيا صارت بين أديه

(سلهم)
يطارش لو شفتهم عود سلهم
هم مثلي الجفه والشوق سلهم
حرام أن چان جفن العين سلهم
بعدهم والحلم حسره عليه

(تجفنه)
كلبك مات عوزك بس تجفنه
ومن شرك نريدك بس تجفنه
أمس وطيت راسك بسته جفنه
وأثر شفتك لحد هسه بديه

(واناقص)
قص شيخطر أبالك واناقص
وشد أحبال عشرتنه واناقص
ما أصاحب نذل مثلك وناقص
وإذا أسلم عليك أغسل أديه

(واعلى منك)
حجه واحد عليه واعلى منك
واريد احجايه اخبرك واعلمنك
أنا بالبير نازل واعلى منك
أحطك وين من نوكف سويه

(شرهن)
جروحك للشمس ياصاح شرهن
وليالي الضيم ماينحمل شرهن
الك عمري رهنته بعد شرهن
واظل مديون لاخر نفس بية

(تمرمر)
اذوبن شمعة واتأمل تمرمر
حبيبي وگلبي بفراگك تمرمر
اسئلك هم ظگت مرة تمرمر
انا لبرحي انگلب حنظل علية

(ضال مني)
گضيت سنين عمرك ضال مني
وانا عگلي بصدودك ضال مني
تگلي شضال منك ضال مني
بس مجرى النفس تلگاه بيه

(ردها)
أخذ وصفة طبيبي هاك ردها
وگله ما يريد يشوف ردها
شمرت حجاره الوگت ردها
على وجهي ونزل دمي بديه

(ماصاح)
تكدر خاطري ونحاس ماصاح
على الردت الولم وياه ماصاح
طبع بيه وره المجفين ماصيح
أبه وعزه نفس وعناد بيه

(مرحل)
تعال وياي ليش اليوم مرحل
الك عكدات وسط احشاي مرحل
جبتها وياك يوم بيوم مرحل
تصير استاذ من تالي عليه

(حالي)
علي ثوب الونين شكثر حالي
شاب وهل شبت من دون حالي
انشدك على احوالك مثل حالي
طايح والهموم اتشيل بيه

(شحله)
مره أيامي بغيابك شحله
وروحي الفرح من بعدك شحله
أديه مجتفه الظهري شحله
الزمن يعكد وانا الميتات أديه

(وسيله)
يصب الدمع من عيني وسيله
وبس البچي صايرلي وسيله
أريد أوصل لمحبوبي وسيله
نساني لو بعد ينشد عليه

(واحد)
وحگ رب التعبده الناس واحد
حبيب الكلب موش أثنين واحد
اذا للحـب ردت اختـار واحد
أختارك الك وأنسه البقيه

(منفي)
بغيابك ماأميز شمس من في
وبدونك أنه ما موجود منفي
دمد أيدك بگلبي وشوف من فيه
أذا غيرك لگيت أعتب عليه

(وشراها)
گضه وكت المعاتب وشراها
طفل وسيوف هجره وشراها
عرضت للبيع روحي وشراها
أخوي وباعها الشمات اليه
♥♥♥♥♥♥♥♥♥♥♥♥♥♥♥♥♥♥♥
تحياتـي:
>>أنـور بـري الـمـاجـدي<<
(جميع الحقوق محفوظـه)©

الرجوع الى أعلى الصفحة اذهب الى الأسفل
معاينة صفحة البيانات الشخصي للعضو
أنور بري الماجدي
بصراوي
بصراوي
avatar

عدد الرسائل : 11
العمر : 32
البلد : العراق _البصره-الزبيـر
الهوايه : المطلعه والشعر وحب الأستكشاف
العمل : كيمياوي
التقيم : 10
نقاط : 25
تاريخ التسجيل : 07/05/2010

بطاقة الشخصية
وسام التميز وسام التميز: 0

مُساهمةموضوع: رد: أبوذيــات ... أنور بري الماجدي   07/05/10, 09:43 am

أنور بري الماجدي
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو
الكرار
بصراوي جديد
بصراوي جديد
avatar

عدد الرسائل : 2
العمر : 28
التقيم : 10
نقاط : 4
تاريخ التسجيل : 16/05/2010

مُساهمةموضوع: رد: أبوذيــات ... أنور بري الماجدي   16/05/10, 11:24 am

عاشت ايدك على الابوذيات
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو
 
أبوذيــات ... أنور بري الماجدي
الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
منتديات شباب البصرة :: المنتديات العامة :: قسم الترحيب والتعارف والمناسبات-
انتقل الى: