قصيدة موعدنه السبت للشاعر عادل محسن
خابرتهه وخابرتني وموعد وياهه اطلبت
وردت منهه يكون باجر وكالت اصبر للسبت
ايام انه اصبر واعدهن ومن الحساب تعبت
وحان موعدنه بساعه اتشيكت واتعطرت
وشلون والله شلون احس نفسي اتأخرت
ومن وصلت الموعد اني شو كلشي ما شفت
وفكري روج يضرب روج واحس نفسي اتقشمرت
وعلى اقرب هاتف انه بكل غضب اركض رحت
وهي من الدكه الاولى علي راسن جاوبت
هي كالت الو وانه صحت بيهه وشتمت
كلت هيج وهيج انتي وهي ابد ما عصبت
ومن سكت شويه كالت ها يمحبوبي شردت
كلت عالموعد اجيتج تالي فشلان ارجعت
وضحكت بضحكهه طويله وكالت انته التيهت
ياحبيبي اليوم جمعه واحنه موعدنه السبت