براءة
الأم
يا بني ضلعك من رجيته
لضلعي جبرته وبنيته
و أحسب الشيب اللي من عمرك جنيته
يا بني طش العمى بعيني
وجيتك بعين القلب أدبي على الدرب المشيته
شيلة العلاكة يا بني
تذجر جفوفي بلعب عمرك عليهن
سنة وجفوفك وردتين على راسي
وبيج أناغي كل فرح عمري النسيته
يابني شوفك يبعث الماي الزلال بعودي و أحيا
وانه ميتة
أبيض عيونك لبن صدري
وسواد عيونك الليل اللي عد مهدك بجيته
وأبنك التوه يناغي الخرزبالكاروك يابني
كتله لاتخاف اليتم جده
كتله يابن وليدي من يجبر على الأيام
تلكه حزام ابوك الماطواني وما طويته
تلكه منه خطوط اضمهن حدر ضلعي
لحد ما موت بعز على السر الحويته
ياعمد بيتي وكمر ليلي
وربيع الشيب والعمر الجنيته
جيت اهزك با عمد بيتي
يكون الدهر ظعظع عظم منك للخيانة
وساومت جرحك على الخسة وخفيته
يابني خلي الجرح ينظف
خله يرعف
خله ينزف
يا بني الجرح اليرفض شداده
علم الثوار يرفرف
يابني لبن الجلب يرضع من حليبي
ولا ابن يشمر لي خبزة من البراءة
يابني ياكلني الجلب عظم ولحم
وتموت عيني ولا دناءة
يابني هاي ايام بفرزنها الكحط ايام محنة
يا بني لا تلثم شرفنا
يا بني يا وليدي البراءة تظل مدى الأيام عفنة
تدري يابني بكل براءة
كل شهيد من الشعب ينعاد دفنه
وخلي ايدك على شيبي
واحلف بطاهر حليبي
كطرة كطره
وبنظر عيني العميته
الاخت
خوي كابلت السجن
حر وبرد ليلي ونهاري
تحملت لجلك شتايم على عرضي
واشعلت ليلي ينهاري
تالي تهتكني بخلك وصلة جريدة
كرة عيونك يخوي بهاي جازيت انتظاري
بهاي اكابل كل اخت تنتظر منك ثار لعرضها
بهاي اكابل امهات اناس وهمومي افضها
جنت ارضى اتدوس اعظامي
وكلك حيل رضها
جنت ارضى تذبح جنيني
ولا براءة عار متبركع تجيني
ولا تكون الكاع تبلعني شأخبر الناس
والينشد شكله
شلون تجابل عيون المحلة
شلون اوصفلك وانت كلك عار وذلة
بعد ألكالك ارض وبانا وخبز
لاتصل يمنة وهاك اخذ عار الجريدة
ولف ضميرك والكرامة
مثل ما تبريت من شعبك
تبيرنا من اسمك
ياشعب هذا التشوفه موش ابنا
27/10/07, 08:15 am
